اسم المؤلف : عدنان عنتر

عارف المقولة الشهيرة اللي بتقولك: “التعليم المدرسي ممكن يجيبلك وظيفة لكن التعلم الذاتى هايجبلك ثروة”
المقولة دي نقدر نطبقها على الإنجليزي: “الإنجليزي هايجيبلك فرص شغل كتير، لكن البزنس إنجلش هايجيبلك فرص شغل من العيار التقيل $$”

لازم تُدرك حاجة واحدة فقط، إنك عشان توصل في مصر للفرص الذهبية اللي محدش بيعلن عنها، يبقى غالبًا لازم تكون مؤهل إنك تدخُل للمجتمع اللي معاه الفرص دي، ومن أفضل الحاجات اللي توصلك للمجتمع دا هو البزنس إنجلش.

لكن إيه هو البزنس إنجلش أساسًا؟ 🤔

من أسمه: هو الإنجليزي المتخصص في عالم البزنس. الإنجليزي اللي بيتم استخدامه في الاجتماعات، ومقابلات العمل، وإرسال الإيميلات، وبين الفري لانسرز مع عملائهم، وبين المديرين وموظفينهم والعكس، وبين زملاء العمل، وبين رؤساء الشركات.. إلخ

يعني من الآخر انجليزي غرضه الأساسي إنه يُستخدم في قطاع الأعمال.

◉ خد بالك انت عشان تخش المجتمع دا بقوة لازم تبهرهم، والبزنس إنجلش هايكون واحد من أقوى الأدوات اللي هاتساعدك في الجزئية دي، لإنه هايخليك تقدر تعبر عن اللي عايز تقوله في البزنس بكل سهولة وبكلمات قوية تخلي اللي قدامك يبقى فاهم كويس أوي إنك مش زيك زي غيرك وإن فيك حاجة مختلفة.. لما توصل للنقطة دي أبواب كتير مغلقة هاتتفتحلك!